13vet KOULZAD SONEREZH
EN ILIZ PLOUGÊR

En iliz Plougêr, kaer ar c’hleved enni, e vo degemeret evit an daouzekvet bloavezh diouzhtu, ur c’houlzad sonerezh gant tri emgav.

AR VREUDEUR PARANTOEN / SONAOZENNOÙ AWENET GANT BREIZH
FIAMMA & FOCO / BEAJ VAROK
BAMDADAN / SONEREZHIOÙ GOUIZIEK HA POBL EUS IRAN

 

>SUL 24 A VIZ EOST : AR VREUDEUR PARANTOEN
Sonaozennoù awenet gant Breizh

Ar sonerezh hengounel eus ar Mor-Bihan ac’h a d’ober o zachenn-c’hoari hag an akordeoñs, ar violoñs hag ar c’han eo o binviji muiañ-karet.

Ar Vreudeur Parantoen a laka ar gaoz war o fenn hag ar sonouriezh e-pad an arvest nevez-se, dre « Teknik Patrick », ur mod dibar da gempenn ar sonerezh.  Komz a reont ivez eus ar “violoñs poubellenn”, eus “spered ar c’hlas mor” hag eus ur bern lidoù dreistordinal all m’o doa kemeret perzh enno pa oant yaouank. An daou soner-se zo mailhed war sonerezh Breizh a-vremañ. Seniñ a reont ur roll tonioù c’hwek ha dibar en ur mod fentus ha tener evit lakaat an dud da vevañ ganto o c’harantez evit ar sonerezh.

Youen hag Alan o deus tremenet ouzhpenn ugent vloaz o seniñ e koublad, hag e Spontus ivez evit lakaat an dud da zañsal. Ar wech-mañ e pedont ac’hanomp d’un abadenn ma vo sonet ur roll tonioù eeunaet m’o deus roet kalz a blas d’ar faltazi ha d’ar seniñ war ar prim. O sonerezh, ma c’hall bezañ skedus pe teñvaloc’h a-wechoù, zo engouestlet ha leun a dalvoudegezh bepred abalamour da reiñ lañs d’ur sonerezh hengounel gwriziennet er bed a-vremañ.

 

 > SUL 31 A VIZ EOST : FIAMMA & FOCO
Beaj varok

 E-barzh Fiamma & Foco en em gav teir sonerez engouestlet e bed ar sonerezh e Frañs : Marta Gliozzi (ograou), Élodie Bouleftour (fleütoù-pigos) hag Armelle Morvan (kan).

Sot int gant ar sonerezh kozh ha plijout a ra kalz dezho ober anaoudegezh gant danvezioù arzel nevez. Reiñ a reont bec’h evit difenn ar sonerezh a wechall hag a vremañ.
Labourat a reont gant ar memes santidigezh ha rikted, ha plijet int o lakaat an dud da vevañ mareoù dibar mac’h a ar sonerezh da vezañ, tro-ha-tro, evel ur brederiadenn, un diviz retorik, ur pezh sonet mil entanet, ur c’hoari pe ur bedenn.
Ar sachbounter Maxime Chevrot a oa deuet e 2022 da vrasaat an triad-se.

 

> SUL 7 A VIZ GWENGOLO : BAMDADAN
Sonerezhioù gouiziek ha pobl eus Iran

« Bamdadan Mousighi », sonerezh ar gouloù-deiz, zo ur mennozh da gentañ penn, gant ur c’houblad unanet dre ar sonerezh. Reza Mehri ha Faranak Modarres o deus graet anaoudegezh en ur skol sonerezh e Karadj, e bannlev Tehran, d’ar mare ma pleustrent war ar santour, ur benveg sklintin e sonioù, deuet ar piano diwarnañ. Buan-tre e choazas Faranak pleustriñ war ar setar (ul lud bihan) ; kanañ a ra e meur a yezh ivez, diouzh ar c’hanaouennoù-pobl eus an impalaeriezh pers kozh. Delc’her a reas Reza da seniñ santour ha dont a reas da vezañ sot gant an Avaaz, ur meskaj don etre ar varzhoniezh pers hag ar mod kanañ ampart eus Iran - ha deuet eo da vezañ unan eus arbennigourien an teknik-se. Reza ha Faranak o doa ranket tec’hout diouzh Bro-Iran kuit a vezañ heskinet gant renad ar vollahed. Erruout a rejont e Frañs e 2014 gant o div verc’h, ha goude ur bern eurioù ha dizeurioù e voe roet ar statud a repuidi bolitikel dezho, ha broadet int bet goude-se. Faranak ha Reza o deus kaset o binviji hag o sonerezh ganto en harlu, hag ur wech ma oa bet stabiloc’h o doare o deus gallet adkregiñ gant o daouad ha gant ar sonadegoù. Rémi Allain ac’h eas ganto e 2021 goude bezañ bet graet anaoudegezh ganto e mediaoueg Ankiniz. Bamet e oa rak o sonerezh neuze e tremenas amzer ganto evit bezañ stummet. Kempenn a ra ar sonerezh gant ar 5 kordenn en e gontrebas – implijet evit kaout ul lusk diazez don ha reoliek hag ivez evel ur violoñs e mod ar reter. E 2023 e troas an triad da bevarad gant Florian Baron, ur soner breton arbennik war an oud ha sonerezhioù ar reter. Florian a chom tost ouzh ar c’han hag e rodelloù hag en em silañ a ra e-barzh an hollad sonioù evit kinklañ hag eilañ gant luskoù ha klotadoù.

Roll-tonioù Bamdadan zo ur meskaj gant sonerezhioù gouiziek ha pobl eus Iran hag ar c’hornioù-bro nepell diouzh Persia kozh, evel ur frouezh leun a varzhoniezh, prederouriezh, politikerezh ha mignoniezh. E pep sonadeg e vez gwriet un neizhig berrbad gant notennoù, evel un oaled m’eo tomm an degemer, gant doujañs hag eskemm. Ur mare a-ispilh m’en em gav gerioù ha kerdin, ma klasker reiñ lañs da soñjenn ar Stroll abalamour da zegas ur banne sklêrijenn d’an deñvalijenn.